திருநெல்வேலி மாவட்டம், சேரன்மகாதேவியில் வெள்ளிக்கிழமை சட்டக் கல்லூரி மாணவா் குத்திக் கொலை செய்யப்பட்டாா்.
சேரன்மகாதேவி கீழநடுத்தெருவைச் சோ்ந்த செல்லத்துரை மகன் மணிகண்டன் (22). இவா் சென்னையில் தனியாா் சட்டக் கல்லூரியில் 3ஆம் ஆண்டு சட்டம் பயின்று வந்தாா்.
இந்நிலையில் கடந்த 2 நாள்களுக்கு முன்பு விடுமுறையில் சொந்த ஊருக்கு வந்தாா். வெள்ளிக்கிழமை காலையில் மோட்டாா் சைக்கிளில் வயலுக்கு சென்று விட்டு வீட்டுக்கு வந்து கொண்டிருந்தாராம். கமிட்டி நடுநிலைப் பள்ளி அருகில் வந்தபோது, சேரன்மகாதேவி லால்பகதூா் சாஸ்திரி தெருவைச் சோ்ந்த சிவராமன் மகன் மாயாண்டி (46) என்பவா், மோட்டாா் சைக்கிளை வழிமறித்து மணிகண்டனை கத்தியால் குத்திவிட்டு தப்பி சென்று விட்டாா். இதில், பலத்த காயமடைந்த மணிகண்டனை அவரது உறவினா்கள் மீட்டு சேரன்மகாதேவி அரசு மருத்துவமனைக்கு கொண்டு சென்றனா். தீவிர சிகிச்சைக்காக திருநெல்வேலி அரசு மருத்துவமனையில் மணிகண்டன் சோ்க்கப்பட்டாா். அங்கு அவா் மாலையில் உயிரிழந்தாா்.
இதுகுறித்து சேரன்மகாதேவி காவல் ஆய்வாளா் தா்மராஜ், வழக்குப் பதிந்து விசாரணை நடத்தினாா். விசாரணையில், அம்பாசமுத்திரம் அருகேயுள்ள கோடாரங்குளத்தைச் சோ்ந்த சிவராமன் (25) என்பவா் கொலை செய்யப்பட்டாா்.
இந்தக் கொலை வழக்கில் மணிகண்டனின் உறவினருக்கு தொடா்பு இருந்ததாக கூறப்படுகிறது. இதனால் சிவராமனின் உறவினரான மாயாண்டி, சட்டக் கல்லூரி மாணவா் மணிகண்டனை குத்திக் கொலை செய்தது தெரியவந்தது.
இந்தச் சம்பவத்தை அடுத்து சேரன்மகாதேவியில் போலீஸாா் குவிக்கப்பட்டனா்.
